انا اول مرة اكتب تدوينة في حياتي لكرهي للكاتبة الطويلة .لكن ما يفعله المجلس العسكري يفوق التدوين والكتابة والشعر من افعال وتصرفات وقوانين مريبة ومرتبكة
لم يكن يوما ما اتخيل انه ينزاح حسني مبارك من الحكم بثورة وكان اقصي امنية انه يموت ونرتاح منه … يوم ما نعمل ثورة يروح المجلس العسكري يخطفها مننا طيب ليه؟؟؟
طيب في ناس بتقول انه هيسلمها لمدني .. وانا شاكك وحقي يوم ثورة 23 يوليو قالوا هتكون لمدني وبعدها هما خطفوها وعجبهم الحال وحلوا الاحزاب وحولوها دولة عسكر واول ناس طيروهم محمد نجيب قائد الثورة ويوسف صديق اول واحد تحرك للقصر … يعني من الاخر ملهومشي امان وده تاريخه ويشلوه هما عسكر زيهم ويتحملوا اخطائهم مثل ما نتحمل اخطاء حسني
ماشي كل اللي بيدافع عن المجلس العسكري ويقولوا انه مفيش فساد فيه وكويسيين.. حد يقول لي هو المجلس ده انبياء ما كل مؤسسات الدولة فيها فساد وهما اكيد فيه فساد عندهم
لغاية هنا وكويس الكلام وبعد ما تنحي حسني ومسك المجلس كله سكت سواء المعترضين انه مجلس عسكري يحكم بعد الثورة او اللي موافق كله فرحان بالثورة …
طبعا مفيش حد ناسي يوم 2 فبراير “موقعة الجمل” واللي حصل فيها والناس كانت بتموت في الميدان وعسار الجيش بيتفرجوا عليهم ولا واحد هز طوله الا اسد الميدان وده حالة استثنائية من حوالي 400 واحد كانوا موجودين
وكله سكت وقال خلاص المجلس حسم الموقف وبقي مع الثورة بعد تنحي مبارك
يقوموا اول قانون وثورة شغالة يكون منع الاضرابات والتظاهر ايه التخلف ده ويطلع وزير العدل يقول انه الاضراب مسموح يوم الجمعة … يا حلاوتك الاضراب بيكون عن العمل والجمعة اجازة يعني مش اضراب حد يفهمه معني اضراب
كمان يوم 9 مارس واللي حصل فيها .. الشرطة العسكرية اعتقلت ناس واخدوا الشباب علي المتحف وهاتك يا تعذيب وكشف عذرية للبنات …. وكله ليه عشان خاطر شفيق بيه يعني لسه العسكر بيدافعه عن بواقي حسني
” كل الثورات بتحول السجون لمتاحف لعرض ما كان يحدث في الماضي .. الا نحن نحول المتحف لسجن المتظاهرين”
وطلعوا وكذبوا الموضوع ده وكانت في صور وفيديوهات وشهادات مش عارف مش بيشوفوا ولا ايه حد يفهم في حاجة اسمها انترنت بينشر الكلام ده عليه ولا هما بيعملوا هبل في الحاجات دي
يوم 9 ابريل طبعا كله فاكر اللي حصل وفرقة 777 اللي نزلت تضرب نار ولا كانه حرب في متظاهرين عزل ايه الشطارة دي وكله كان عارف عشان خاطر الظباط اللي رفضوا الفساد وفي الاخر طلعتوهم شوية مزورين ولابسين عسكري وفيه شاب مات وفي الاخر اتهمتوا طارق كامل وقبضوا عليه واتقدم للنيابة”النيابة العامة ” مش العسكرية زي المتظاهرين وطلع براءة يبقي شهادة الناس كانت صح وضرب بالرصاص من الجيش مش فلول زي البيان اللي طلعتوه
كمان يوم اقتحام كلية الاعلام من الشرطة العسكرية وايه كهربوا الطلبة ودي حادثة لم تحدث من سنة 1954 انه العسكر يقتحموا الجامعة عشان ايه سامي الشريف خدام الحزب الوطني ولاعق جزمة جمال
ويوم اللي حصل قدام سفارة الكلاب طبعا الشباب طلعوا اتظاهرا عادي وطالبوا بتنكيس العلم لكن الشرطة والجيش ايد واحدة علي المتظاهرين وضربوا نار في الهوا وغاز مسيل وفيه اتنين اتصابوا منهم واحد قعد 3 ايام في المستشفي بدون علاج عشان خاطر خايفين يعملوا محضر بضرب النار ده وكان هيموت لولا ستر ربنا ويمسكوا الشباب وينزلوا علي بطنهم ويقولوا لهم ” قبل ما ننزل العلم هنزل لباسك ” هي دي الشرطة اللي عايزينها ترجع .. اخي احاااااااااااا وفي الاخر يحولوا الشباب محاكمات عسكرية تاني عسكرية … ايوة تاني عسكرية هما شاطرين بس انهم يحولوا المتظاهرين محاكمات عسكرية لانك الكبار البهوات واحد في شرم والباقي بيتمتع في طرة بما لذة وطاب والتهمة ايه قال اقتحام السفارة …. يا شوية بهايم السفارة دي في فين والشباب اللي بيتظاهر فين ولا هي تهم وخلاص وكمان ايه تهم غبية
طبعا غير شهادة بثينة كامل اللي قالت فيها البيه عتمان انه الشباب في التحرير فيه علاقات جنسية وكمان مخدرات نفس الكلام الوسخ اللي قالوا طلعت زكريا ” وقال ايه بيحموا الثورة طيب منين ” ابقي قابلني
وكل واحد يتكلم ولا ينتقد المجلس يطلعوا زي البراشوات علي التليفزيون ويقولوا انهم الجيش وفوق الانتقاد … لا يا حبي انتم دلوقتي شغالين سياسة وهتنتقدوا طول ما انتم ماسكين الحكم ومفيش حد فوق الانتقا ولو مش عايزين حد ينتقدكم خلاص ارجعوا ثكناتكم وسيبوا احنا نحكم البلد “مجلس رئاسي ” هي مش حسبة برما
طيب من الاخر كده طنطاوي باشا قال انه حسني طلب ضرب المتظاهرين بالنار والجيش رفض… هو ليه مش عايز يروح يشهد بالكلام ده … دي وحدها تهمة تلبسه البدلة الحمرا ولا هو عايز يطلع حسني بالعفو والتصالح
عشان كده كله نازل التحرير يوم 27 عشان الطلبات اللي نشرت ومطالب الثورة الاساسية اللي لسه ما كملتشي زائد القوانين والتصرفات المجلس اللي بيعملها لوحده وكلها زي الزفت قال ايه منعوا التظاهر والاضرابات … حد عاقل يقول انه دي ثورة مش لعبة
ليست هناك تعليقات:
إرسال تعليق